Kalda stríðið hið síðara? Hvers vegna samskipti Rússlands og Bandaríkjanna versnuðu til muna eftir átökin í Úkraínu ; A Second Cold War? Causes for Worsening US-Russia Relations After Ukraine

Í ritsmíð þessari er varpað ljósi á helstu ástæður þess að samskipti Bandaríkjanna og Rússlands fóru versnandi eftir innlimun Rússa á Krímskaga. Því er haldið fram að svo hafi verið vegna aðstæðna ríkjanna tveggja í alþjóðakerfinu og mismunandi sýn þeirra á hlutverk ríkja innan þess. Nýklassískar raunhyggjukenningar og félagsleg mótunarhyggja eru notaðar til að greina samskipti ríkjanna. Upphafi átaka í Kænugarði er lýst og útskýrt hvernig þau breiddust út til annarra hluta Úkraínu. Jafnframt er farið yfir hvernig Rússar fóru að því að innlima Krímskaga með liðsinni hliðhollra Krímverja þar sem blásið var til afar umdeildrar atkvæðagreiðslu á skaganum um framtíð hans. Þá er viðbrögðum Bandaríkjamanna við aðgerðum Rússa lýst en einnig viðbrögðum Rússa við þeirri gagnrýni. Niðurstöður ritgerðarinnar eru þær að samskiptin hafi versnað vegna þess að ríkin tvö eru ósammála í grundvallaratriðum um það hvernig ríki eigi að hegða sér í alþjóðakerfinu. Á sama tíma hafa hlutfallsleg völd Rússa aukist sem veldur meiri spennu á milli þessara tveggja stórvelda.